ਨਾਨੀ ਅਰਦੇਸ਼ਰ ਪਾਲਖੀਵਾਲਾ

ਨਾਨਾਭੋਏ "ਨਾਨੀ" ਅਰਦੇਸ਼ਰ ਪਾਲਖੀਵਾਲਾ (16 ਜਨਵਰੀ 1920 – 11 ਦਸੰਬਰ 2002) ਭਾਰਤ ਦੇ ਇੱਕ ਵਕੀਲ, ਸੰਵਿਧਾਨ ਮਾਹਰ, ਅਤੇ ਅਰਥ-ਸ਼ਾਸਤਰੀ ਸਨ। ਹਰ ਸਾਲ ਭਾਰਤੀ ਬਜਟ ਬਾਰੇ ਚਰਚਾ ਲਈ ਉਸਦੇ ਭਾਸ਼ਣ ਬਹੁਤ ਮਸ਼ਹੂਰ ਸੀ। ਇਹ ਭਾਸ਼ਣ ਇੱਕ ਛੋਟੇ ਜਿਹੇ ਹਾਲ ਤੋਂ ਸ਼ੁਰੂ ਹੋਏ ਸਨ। ਹੌਲੀ ਹੌਲੀ ਦਰਸ਼ਕਾਂ ਦੀ ਗਿਣਤੀ ਇੰਨੀ ਵਧ ਗਈ ਕਿ ਮੁੰਬਈ ਦਾ ਬਰਬੋਰਨ ਸਟੇਡੀਅਮ ਵਰਗਾ ਪ੍ਰਮੁੱਖ ਮੈਦਾਨ ਬੁੱਕ ਕਰਵਾਉਣਾ ਪੈਂਦਾ ਸੀ। ਲੈਕਚਰ ਸੁਣਨ ਲਈ ਪੜ੍ਹੇ ਲਿਖੇ ਅਧਿਆਪਕ, ਉਦਯੋਗਪਤੀ, ਵਕੀਲ, ਕਾਰੋਬਾਰੀ ਅਤੇ ਆਮ ਲੋਕ ਹੁੰਦੇ ਸਨ। ਨਾਨੀ ਪਾਲਖੀਵਾਲਾ ਨੇ 1977 ਤੋਂ 1979 ਦੌਰਾਨ ਅਮਰੀਕਾ ਵਿੱਚ ਭਾਰਤ ਦੇ ਰਾਜਦੂਤ ਵਜੋਂ ਕੰਮ ਕੀਤਾ। ਉਸਨੂੰ 1998 ਵਿੱਚ ਭਾਰਤ ਸਰਕਾਰ ਦੁਆਰਾ ਪਦਮ ਵਿਭੂਸ਼ਨ ਨਾਲ ਸਨਮਾਨ ਕੀਤਾ ਗਿਆ ਸੀ।

ਨਾਨੀ ਪਾਲਖੀਵਾਲਾ
ਜਨਮ	(1920-01-16)16 ਜਨਵਰੀ 1920 ਬੰਬਈ, ਭਾਰਤ
ਮੌਤ	11 ਦਸੰਬਰ 2002(2002-12-11) (ਉਮਰ 82) ਮੁੰਬਈ, ਭਾਰਤ
ਕਿੱਤਾ	ਵਕੀਲ, ਸੰਵਿਧਾਨ ਮਾਹਰ, ਅਰਥ-ਸ਼ਾਸਤਰੀ
ਕਾਲ	20ਵੀਂ ਸਦੀ
ਦਸਤਖ਼ਤ

ਜੀਵਨ

ਨਾਨੀ ਦਾ ਜਨਮ 1920 ਵਿੱਚ ਮੁੰਬਈ ਦੇ ਇੱਕ ਮੱਧ ਵਰਗ ਪਾਰਸੀ ਪਰਿਵਾਰ ਵਿੱਚ ਹੋਇਆ ਸੀ। ਉਸਦੀ ਸਕੂਲੀ ਪੜ੍ਹਾਈ ਮੁੰਬਈ ਦੇ ਮਾਸਟਰਜ਼ ਟਿਊਟੋਰੀਅਲ ਹਾਈ ਸਕੂਲ ਅਤੇ ਸੈਂਟ ਜੇਵੀਅਰ ਹਾਈ ਸਕੂਲ ਵਿਖੇ ਹੋਈ। ਉਹ ਮੁੰਬਈ ਯੂਨੀਵਰਸਿਟੀ ਦੇ ਲੈਕਚਰਾਰ ਦੇ ਤੌਰ ਤੇ ਸੇਵਾ ਕਰਨਾ ਚਾਹੁੰਦਾ ਸੀ, ਪਰ ਉੱਥੇ ਉਸਨੂੰ ਨਿਯੁਕਤ ਨਹੀਂ ਕੀਤਾ ਗਿਆ। ਇਸ ਲਈ ਉਸ ਨੇ ਪੜ੍ਹਾਈ ਜਾਰੀ ਰੱਖਣ ਦਾ ਫੈਸਲਾ ਕੀਤਾ। ਪਰੰਤੂ ਉਦੋਂ ਤੱਕ ਬਹੁਤੇ ਕੋਰਸਾਂ ਵਿੱਚ ਦਾਖਲਾ ਬੰਦ ਹੋ ਚੁੱਕਾ ਸੀ। ਇਸ ਲਈ ਉਹ ਮੁੰਬਈ ਸਰਕਾਰੀ ਲਾਅ ਕਾਲਜ ਵਿੱਚ ਭਰਤੀ ਹੋ ਗਿਆ। ਜਲਦੀ ਹੀ ਉਸ ਨੂੰ ਅਹਿਸਾਸ ਹੋਇਆ ਕਿ ਉਹ ਇਸ ਵਿਸ਼ੇ ਨੂੰ ਪਸੰਦ ਕਰਦਾ ਸੀ।