ਉਨੀਂਦਰਾ (ਨਿੱਕੀ ਕਹਾਣੀ)

"ਉਨੀਂਦਰਾ" (ਰੂਸੀ: Спать хочется) 1888 ਵਿੱਚ ਲਿਖੀ ਐਂਤਨ ਚੈਖ਼ਵ ਦੀ ਇੱਕ ਰੂਸੀ ਨਿੱਕੀ ਕਹਾਣੀ ਹੈ। 

"ਉਨੀਂਦਰਾ"
ਲੇਖਕ ਐਂਤਨ ਚੈਖ਼ਵ
ਮੂਲ ਸਿਰਲੇਖ	Спать хочется
ਦੇਸ਼	ਰੂਸ
ਭਾਸ਼ਾ	ਰੂਸੀ
ਪ੍ਰਕਾਸ਼ਨ	ਪੀਟਰਬਰਗਸਕਾਇਆ ਗਾਜ਼ੀਤਾ
ਪ੍ਰਕਾਸ਼ਕ	ਐਡੋਲਫ ਮਾਰਕਸ (1900)
ਪ੍ਰਕਾਸ਼ਨ ਮਿਤੀ	25 ਜਨਵਰੀ 1888 (ਪੁਰਾਣਾ ਕਲੰਡਰ)

ਪ੍ਰਕਾਸ਼ਨ

ਚੈਖ਼ਵ ਨੇ ਆਪਣੀ ਲੰਮੀ ਕਹਾਣੀ 'ਸਟੈਪੀ' ਤੇ ਕੰਮ ਕਰਦੇ ਹੋਏ ਇੱਕ ਦਿਨ ਦੇ ਦੌਰਾਨ ਇਹ ਕਹਾਣੀ ਲਿਖੀ, ਜਿਸ ਨਾਲ ਉਹ ਚੜ੍ਹੇ ਮਹੀਨੇ ਦੀ ਸ਼ੁਰੂਆਤ ਦੇ ਕੁਝ ਭੁਗਤਾਨ ਕਰਨ ਲਈ ਕੁਝ ਪੈਸਾ ਕਮਾ ਸਕਦਾ। ਇਹ ਗੱਲ ਚੈਖ਼ਵ ਨੇ ਅਲੈਕਸੀ ਪਲੇਸ਼ੈਏਵ ਨੂੰ 23 ਜਨਵਰੀ ਦੀ ਚਿੱਠੀ ਵਿੱਚ ਦੱਸੀ ਸੀ। ਇਹ ਪਹਿਲੀ ਵਾਰ ਪੀਟਰਬਰਗਸਕਾਇਆ ਗਾਜ਼ੀਤਾ ਦੇ ਨੰ. 24, 25 ਜਨਵਰੀ 1888 ਦੇ ਅੰਕ ਵਿੱਚ ਪ੍ਰਕਾਸ਼ਿਤ ਹੋਈ ਸੀ। ਇਸ ਤੇ ਏ. ਚੀਖੋਂਤੇ (A. Чехонте) ਹਸਤਾਖਰ ਸਨ। ਥੋੜੇ ਸੰਖੇਪ ਰੂਪ ਵਿੱਚ ਅਤੇ ਦੁਬਾਰਾ ਲਿਖੇ ਅੰਤ ਨਾਲ ਇਹ ਉਦਾਸ ਲੋਕ (Хмурые люди, ਖਮੂਰੀਏ ਲਿਊਡੀ, 1890) ਨਾਂ ਦੇ ਇੱਕ ਸੰਗ੍ਰਹਿ ਵਿੱਚ ਪ੍ਰਕਾਸ਼ਿਤ ਹੋਈ। ਚੈਖੋਵ ਨੇ 1899 - 1901 ਵਿੱਚ ਐਡੋਲਫ ਮਾਰਕਸ ਦੁਆਰਾ ਪ੍ਰਕਾਸ਼ਿਤ ਆਪਣੀਆਂ ਸਮੁਚੀਆਂ ਰਚਨਾਵਾਂ ਦੀ ਪੰਜਵੀਂ ਜਿਲਦ ਵਿੱਚ ਇਸ ਨੂੰ ਸ਼ਾਮਲ ਕੀਤਾ ਸੀ। 

ਕਥਾਨਕ

ਵਾਰਕਾ ਤੇਰ੍ਹਾਂ ਸਾਲਾਂ ਦੀ ਕੁੜੀ ਹੈ, ਜਿਸ ਨੂੰ ਦਿਨ ਵਿੱਚ ਆਪਣੇ ਬੌਸ ਦੀ ਦੁਕਾਨ ਵਿੱਚ ਆਪਣੇ ਸਾਰੇ ਕੰਮ ਕਰਨੇ ਪੈਂਦੇ ਹਨ ਅਤੇ ਰਾਤ ਨੂੰ ਉਹਨਾਂ ਦੇ ਦੁੱਧ ਚੁੰਘਦੇ ਬਾਲਕ ਦੀ ਦੇਖਭਾਲ ਕਰਨੀ ਪੈਂਦੀ ਹੈ।

ਕਹਾਣੀ ਵਾਰਕਾ ਨਾਲ ਸ਼ੁਰੂ ਹੁੰਦੀ ਹੈ ਜੋ ਰਾਤ ਨੂੰ ਬਾਲਕ ਨੂੰ ਝੂਲਾ ਝੁਲਾਉਂਦੀ ਹੈ, ਜੋ ਸੌਣ ਤੋਂ ਇਨਕਾਰੀ ਹੈ, ਜਦਕਿ ਵਾਰਕਾ ਨੂੰ ਇਸ ਸਮੇਂ ਨੀਂਦ ਤੋਂ ਸਿਵਾ ਹੋਰ ਕੁਝ ਨਹੀਂ ਚਾਹੀਦਾ ਹੁੰਦਾ। ਕਈ ਵਾਰ ਲੋਰੀ ਗਾਉਣ ਤੋਂ ਬਾਅਦ, ਵਾਰਕਾ ਨੂੰ ਨੀਂਦ ਆ ਘੇਰਦੀ ਹੈ, ਅਤੇ ਸੁਪਨੇ ਵਿੱਚ ਉਸਨੂੰ ਯਾਦ ਆਉਂਦੀ ਹੈ ਆਪਣੇ ਪਿਤਾ ਦੀ ਮੌਤ। ਤਦ ਉਸ ਦੀ ਮਾਲਕਣ ਉਸਨੂੰ ਆ ਜਗਾਉਂਦੀ ਹੈ ਜੋ ਬੱਚੇ ਨੂੰ ਦੁੱਧ ਚੁੰਘਾਉਣ ਆਉਂਦੀ ਹੈ। ਇਸ ਤੋਂ ਬਾਅਦ ਵਾਰਕਾ ਫਿਰ ਸੌਂ ਜਾਂਦੀ ਹੈ ਅਤੇ ਉਸਦਾ ਸੁਪਨਾ ਫਿਰ ਚਾਲੂ ਹੋ ਜਾਂਦਾ ਹੈ। ਐਨੇ ਨੂੰ ਸਵੇਰ ਹੋ ਜਾਂਦੀ ਹੈ, ਜਦੋਂ ਉਸ ਲਈ ਦਿਨ ਦਾ ਪਹਿਲਾ ਹੁਕਮ ਸੁਣਾਇਆ ਜਾਂਦਾ ਹੈ।

ਨਿੱਤ ਦਿਨ ਵਾਰਕਾ ਦੇ ਕੰਮ ਉਹੋ ਹੀ ਹੁੰਦੇ ਹਨ। ਦਿਨ ਭਰ ਹੁਕਮ ਪੁਗਾਉਂਦੇ ਰਹਿਣਾ ਅਤੇ ਰਾਤ ਨੂੰ ਰੋਂਦੇ ਰਹਿਣ ਵਾਲੇ ਬੱਚੇ ਨੂੰ ਸੰਭਾਲਣਾ। ਕੁੜੀ ਲਈ ਆਖਰ ਇਹ ਸਭ ਅਸਹਿ ਹੋ ਜਾਂਦਾ ਹੈ ਉਹ ਆਪਣੇ ਸੁਪਨੇ ਨੂੰ ਮੁੜ ਚਾਲੂ ਰੱਖਣਾ ਚਾਹੁੰਦੀ ਹੈ। ਉਸ ਨੂੰ ਗਸ਼ ਪੈਣੇ ਸ਼ੁਰੂ ਹੋ ਜਾਂਦੇ ਹਨ। ਅਖੀਰ ਵਿੱਚ, ਉਸ ਨੂੰ ਇਹ ਸਮਝ ਪੈਂਦਾ ਹੈ ਕਿ ਉਹਦੇ ਰਾਹ ਵਿੱਚ ਰੁਕਾਵਟ ਜੋ ਉਹ ਕਰਨਾ ਚਾਹੁੰਦੀ ਹੈ ਉਹ ਕਰਨ ਨਹੀਂ ਦਿੰਦੀ ਉਹ ਇਹ ਬਾਲਕ ਹੀ ਹੈ: ਸੌਂ ਜਾਣ ਅਤੇ ਮੁੜ ਸੁਪਨਾ ਲੈਣਾ ਸ਼ੁਰੂ ਕਰਨ ਲਈ, ਉਹ ਉਸ ਦਾ ਗਲਾ ਘੁੱਟ ਦਿੰਦੀ ਹੈ।