ਤਰੌਜਾ

ਵਿਆਹ ਤੋਂ ਪਿੱਛੋਂ ਜਦ ਲੜਕੀ ਤੀਜੀ ਵਾਰ ਸਹੁਰੇ ਘਰ ਫੇਰਾ ਪਾਉਂਦੀ ਸੀ, ਉਸ ਨੂੰ ਤਰੋਜਾ ਕਹਿੰਦੇ ਸਨ। ਤਰੌਜੇ ਸਮੇਂ ਲੜਕੀ ਦੇ ਮਾਪਿਆਂ ਵੱਲੋਂ ਲੜਕੀ ਨੂੰ ਸੂਟ, ਪ੍ਰਾਹੁਣੇ ਨੂੰ ਕੱਪੜੇ ਅਤੇ ਸਹੁਰੇ ਪਰਿਵਾਰ ਦੇ ਹੋਰ ਮੈਂਬਰਾਂ ਨੂੰ ਵੀ ਕਪੜੇ ਦਿੱਤੇ ਜਾਂਦੇ ਸਨ। ਜੇਕਰ ਮੁਕਲਾਵੇ ਵੇਲੇ ਲੜਕੀ ਨੂੰ ਸੰਦੂਖ ਨਹੀਂ ਦਿੱਤਾ ਜਾਂਦਾ ਸੀ ਤਾਂ ਤਰੌਜੇ ਸਮੇਂ ਸੰਦੂਖ ਵੀ ਦਿੱਤਾ ਜਾਂਦਾ ਸੀ। ਤਰੌਜੇ ਤੋਂ ਪਿੱਛੋਂ ਮੁੰਡੇ/ਕੁੜੀ ਦਾ ਸਹੁਰੇ ਘਰ ਆਉਣਾ ਜਾਣਾ ਆਮ ਹੋ ਜਾਂਦਾ ਸੀ।

ਪਹਿਲੇ ਸਮਿਆਂ ਵਿਚ ਮੁੰਡੇ/ਕੁੜੀ ਦਾ ਵਿਆਹ ਛੋਟੀ ਉਮਰ ਵਿਚ ਕਰ ਦਿੱਤਾ ਜਾਂਦਾ ਸੀ। ਜਦ ਮੁੰਡਾ/ਕੁੜੀ ਜੁਆਨ ਹੋ ਜਾਂਦੇ ਸਨ, ਉਸ ਸਮੇਂ ਮੁਕਲਾਵਾ ਦਿੱਤਾ ਜਾਂਦਾ ਸੀ। ਮੁਕਲਾਵੇ ਤੋਂ ਪਿੱਛੋਂ ਤਰੌਜਾ ਹੁੰਦਾ ਸੀ। ਹੁਣ ਮੁੰਡੇ/ਕੁੜੀਆਂ ਦਾ ਵਿਆਹ ਮੁਕਲਾਵਾ ਇਕੱਠਾ ਹੀ ਹੋ ਜਾਂਦਾ ਹੈ। ਇਸ ਲਈ ਹੁਣ ਤਰੌਜੇ ਦੀ ਰਸਮ ਵੀ ਖ਼ਤਮ ਹੋ ਗਈ ਹੈ।